Pola normalización de la llingua asturiana
Oficialidá del asturianu darréu

Da la impresión de que el executivu asturianu nun tien nenguna intención de movese haza la oficialidá, ye pa esmolecese el l’estáu de desatención que tienen acutao pal asturianu. Sigue ensin dase una situación de normalidá en materia llingüística, tantu no que cinca a la toponimia (qu’en munchos casos sigue ensin respetase), comu en cuantes a garantizar l’acesu a la documentación y la información n’asturianu, nin munchu menos exercer el llexítimu drechu a caltener la comunicación cola alministración en llingua asturiana.

La so defensa y normalización enxamás se pue ver como una agresión a la llingua castellana que toos apreciamos, tolo contrariu ya que l’emplegu del asturianu nun ye más que niciu de xusticia, normalidá, modernidá y d’elemental sentíu democráticu. Cumplir les lleis, respetar la toponimia oficial asina como visualizar l’idioma nos medios de comunicación y n’alministración pública, amiesta derechos, oportunidaes y desarrollu.

Si’l rexonalismu manifestáu pol Sr. Francisco Álvarez-Cascos ye realmente sinceru y nun respuende a una maniobra d’oportunismu eleutoralista, tien la obligación moral y la responsabilidá d’asitiar como ún de los puntos prioritarios de la axenda política del gobiernu’l axustar un procesu de reforma estatutaria qu’incluya l’oficialidá de la llingua asturiana, pa acabar cola situación de anormalidá en materia llingüística.

Fai falta un nuevu puxu, necesariu pa llograr alcuerdos xenerosos ente tolos partios con representación parllamentaria na Xunta Xeneral y empobinase coordinadamente peles mesmes víes d’una pernecesaria xunidá d’aición. Agora más que nunca ye precisu xuncir fuercies, superar rocees y desalcuentros y lluchar pol oxetivu común, que nun ye otru que l’oficialidá del asturianu.

Ye’l momentu de que el nuevu executivu pase a l’acción y que faiga un apueste pol asturianu, tienen que dexase ya de cálculos interesáos y d’estratexes ellectoralistes y comprometese d’alcuerdu col so deber a poner “l’oficalidá del asturianu” nel centru del debate politicu, pa garantizar la so igualdá xurídica col castellanu, asina como la conservación d’un de los elementos más importantes del nuesu patrimoniu cultural.

Ye tiempu pa cumplir y pa facer… Cumplir les lleis y decretos que nos asisten y que, sistemáticamente la mesma Alministación desprecia ya inora. Facer y tomar determinaciones que faigan que la llingua asturiana tea presente con normalidá en tolos aspeutos de la vida pública y que la población que s’espresa nella tenga asegurada la so igualdá xurídica al traviés d’un marcu d’oficialidá nel Estatutu d’Autonomía.

Ye de tou puntu irresponsable que los retayos sían una sida pa la vulneración de los derechos llingüisticos de les persónes y pal cumplimientu de les lleis. Claro que l’oficialidá del asturianu supón un gastu, pero esi gastu pue ser mínimu si les coses se faen con sentíu común, nun ta demas recordar que Asturies yá dedica un presupuestu añal a la política llingüística que nun se vería enforma aumentáu nun estatus d’oficialidá.

La situación na que s’atopa la cultura asturiana dientro de la sociedá estremase sigún les distintes capes sociales que nella s’amiesten, asina nes capes cimeres tiense como idea global que la identidá tradicional asturiana nun ye amortizable como si puede selo l’arte comtemporaneu onde lo “moderno y lo tecnoloxico” son conceutos utilizaos en contraposición a lo que ye Asturies. Esta xente fai de manera permanente de muria y de torga pal desendolque de la cultura asturiana tendiendo a non igualar “les cultures”, sinón a esaniciar la cultura tradicional en beneficiu de la posmoderna.

Lo tradicional tien unes caracteristiques definitories de les que tenemos qu’avergoñanos y a les que hai qu’arrenunciar n’ares del progresu, una amuesa de les carencies culturales de los qu’inpunemente imponen una cultura ayena y arrenieguen del país. La cultura posmoderna nun cuerre dengun peligru esta tien les sos calces bien trabayaes y cuantayá que tien el so futuru ganáu asitiáu nos meyores y más rellumantes llugares, l’únicu peligru que güei se da apunta claramente a la cultura tradicional asturiana.

Asturies tien que dexar d’una vegada de tar considerada como una entidá receptora de la cultura producida fora de les nuestres fronteres, baxu dengún conceutu se puede dexar en manos de promotores que se dediquen a gastar les poques perres que tien esti país en facer una programación cultural llena d’espresiones artistiques pa minoríes, llenando Asturies de toros, danza de caballos, manolos escobares, pantojes,etc., estos gastos nun parecen costar dengún esfuerzu pero sin embargu-yos paez imposible dedicar esi dineru a la cultura tradicional.

Asturies necesita con urxencia superar el procesu d’alcuturización nel que ta sumíu “reivindicandose y promocionandose” como productora y emisora nel ambitu cultural, solo asina conseguiremos recuperar el pretixu social y adquirir proyección tantu a nivel nacional como internacional. Tenemos qu’entender la cultura como una auténtica plataforma dende la qu’apostar por una Asturies viva y dinámica, namái ‘l babayu, el más fondamente incultu de los mortales apondera y da puxu a lo ayeno ensin estimanza de lo propio.

Pa ello ye necesariu un profundu cambéu na política cultural desendolcada n’Asturies, calteniendo en tou momentu una politica tendente a demostrar que’l conservación y usu d’elementos de la cultura tradicional ye rentable tantu económica como socialmente y de xacíu siempre en collaboración colos axentes sociales y culturales del país que faiga que la cultura tradicional sía un espacio complementariu d’educación y autentificación de la ciudadanía y que valga pa reforzar l’identidá del país.

Tien que ser un oxetivu prioritariu de la Conseyeria de Cultura curiar y protexer el nuesu patrimoniu cultural de cualesquier agresión externa, da-y puxu a la propia tierra, a les sos potencialidaes y a la dignidá de la nación asturiana.

Va unos meses espublizaba un artículu, La esmolecedora situación del movimientu de reivindicación llingüística, nel que facía una analís de la situación que vive la vindicación del nuesu idioma n’Asturies. Dende entós fueron munches les persones que me contestaron, de forma pública o privada, pa compartir conmigo les sos esmoliciones sobre esti asuntu. Foi unu d’ellos, Vítor Suárez, que me contestare con otru artículu asemeyáu, quien me convenció pa ponenos en marcha, pa tomar la iniciativa.

Dempués de dellos meses trabayando d’un xeitu discretu y modestu, pero con ganes, esta selmana sal a la lluz una organización nueva, Iniciativa pol Asturianu, que vien a complementar el texíu asociativu de la reivindicación llingüística n’Asturies.

Adulces, decenes de persones yá tomaron la iniciativa y tán poniendo un granín d’arena d’estremaes formes pa qu’esti proyectu seya una realidá con futuru, más que pol fechu de crear una organización, que nun ye más qu’una ferramienta, pa cuntar con una plataforma dende la que llevar alantre campañes y acciones que supongan avances tanxibles pal asturianu.

Estes selmanes atrás aconceyóse coles organizaciones que yá vienen trabayando nesti campu, d’una o d’otra manera , pa presentanos y abrir víes de comunicación y collaboración. Iniciativa pol Asturianu vien a construyir y a arriquecer el trabayu pol asturianu, nunca a poner torgues o crear problemes, y el recibimientu foi mui positivu per parte de toles organizaciones coles que falamos.

Les persones que formamos parte d’Iniciativa pol Asturianu, munchos d’ellos xente mozo, vienen con ganes y con una idea bien clara, el futuru del asturianu depende de nós, de tolos asturianos y asturianes. La clas política, los poderes en xeneral, tienen una responsabilidá perimportante por nun reconocer los nuesos drechos al traviés de la oficialidá y d’unes polítiques de normalización actives, pero ye la ciudadanía la única que puede garantizar la tresmisión del idioma y la so sobrevivencia real, col usu en toles estayes de la sociedá. Implicar a la xente, facer que tomen la iniciativa pol asturianu, sedrá’l nuesu llabor prioritariu.

Esti sábadu que vien, 17 d’avientu, daremos anuncia pública d’esti proyectu que yá ta en marcha con un actu nel que cuntaremos con munches persones de toles estayes de la sociedá, con delles actuaciones y dalgunes sorpreses. Un momentu pa entamar nesti llabor de devolver la ilusión nel trabayu, llargu y duru, de caltener, recuperar y dignificar la nuesa llingua. Anímovos a sumavos y tomar la Iniciativa pol Asturianu.

Iniciativa pol Asturianu puede siguise yá en facebook.com/iniciativapolasturianu y en Twitter en @iniciativaxAST

Estos díes atrás vía nel cine la película “Criadas y señoras”. Una emocionante y al mesmu tiempu allegre producción de Tate Taylor que se desenrrolla nel Mississippi de los años sesenta, cuando los drechos civiles de los negros entá yeren un suañu por cumplir. Nesta sociedá onde s’aboliere l’esclavismu pero los afroamericanos vivíen como ciudadanos de tercera división mui pocos lluchaben por camudar esta situación. Lleer más »