Tocábame esti sábadu entregar el segundu premiu del gallardón al Meyor Blogue escritu n’asturianu de 2009 pol nuesu humilde sofitu dende Xareos! a esta iniciativa y prestábame felicitar a los entamandores d’esti proyectu, que nada nun tuvo que ver col primer alcuentru Sidra&Blogues, ganando nesta ocasión en conteníos y sobre manera na utilidá del mesmu.

Y ye qu’aquel I Sidra&Blogues nun foi más qu’eso, una charra interesante sobre la sidra que tomamos y los blogues que facíemos. Anque ensin aquello nun fueren posibles munches de les coses qu’asocedieron na rede dende entós. Con aquel alcuentru axuntáronse esfuercios y gracies a ello, el panorama camudó enforma dende 2007. A mou, la presencia de la llingua asturiana na rede y nes tecnoloxíes nueves va medrando, y güei cuntamos con sistemes operativos y programes n’asturianu, y hasta con un traductor automáticu a la nuesa llingua.

Y lo más llamativo ye qu’estes iniciatives (sacante’l traductor automáticu) nun surden del sofitu de les instituciones, sinón de xente pa la mayoría anónimos, que tán faciendo pol asturianu un llabor mui importante y poco reconocíu. Xente que tuvo sollerte y supo ver que de la mesma forma que nos años setenta se necesitaba una lliteratura n’asturianu actualizada y ensin diglosia, anguaño la supervivencia del asturianu nun ye posible nun siendo al traviés del desenrrollu de los preseos que con munchu esfuerciu personal van sacando alantre na rede.

Cuando les plataformes profesionales que tien una llingua n’internet son tan poques como asocede nel casu del asturianu, ye pernecesario que los falantes “de base” garren la iniciativa y dean una visibilidá que-y nieguen dende’l poder. La comunidá de blogueros ta faciendo esi trabayu y alcuentros como’l del sábadu amuesen a la sociedá lo que se ta faciendo: una blogosfera cada vegada mayor y meyor, con más variedá y calidá.

Animo a los entamadores de la iniciativa a siguir col trabayu pa que cuntemos con una tercer edición del Sidra&Blogues y de los premios al Meyor Blogue. La iniciativa tien utilidá social y afala la presencia viva del nuesu idioma na rede. Norabona, collacios blogueros.
Y por supuestu, norabona a los ganadores.

Esta entrada publicóse a 22/02/2010 a las 1:08 am y ta archivada baxo Ensin clasificar, Inaciu Galán y González . Pues ver les rempuestes siguiendo RSS 2.0. Pues dexar una rempuesta, o trackback dende la to propia web.