El gobiernu d’esti país tien daqué bien prestoso: Siempres tien la capacidá de sorprender a ún. La decisión del equipu del Sr. Areces de negase a la construcción d’una llinia de tren d’alta velocidá pela cornisa cantábrica, ye la última d’estes “sorpreses”.

Na obra de la célebre llinia tán d’alcuerdu gobiernos tan distintos como los de País Vascu (PNV), Cantabria (PRC y PSOE) y Galicia (PSOE y BNG), ye dicir, toles comunidaes menos l’asturiana. Esto ye lo que se llama “fechu diferencial”. De les trés comunidaes onde ta nel gobiernu el PSOE, ye la nuesa, la única que nun quier que’l so territoriu cuente con un mediu de tresporte rápidu, modernu y ecolóxicu.

Pero, pensándolo bien, tampoco nun sorprende esta decisión del gobiernín. L’aislamientu d’Asturies ye quiciabes l’únicu de los “fechos diferenciales” del nuesu país que se vien afalando nestos trenta años. A lo meyor, con una Asturies bien comunicada diba ser más complicao vendé-y a la xente la yá vieya idea del llastre que supón l’aislamientu pa la nuesa economía y tovía más complicao echá-y la culpa de la mala xestión a esta y otres causes, como Europa, Corea o qué sé yo, un trasgu economista. Asina podemos entender postures hestóriques como la de la variante de Payares, la continuidá del peaxe del Güerna, a pesar de les promeses, les torgues que se punxieron al establecimientu de compañíes aerees y esta nueva decisión de que l’AVE nun pase per Asturies.

El tren que se propón permitiría a Asturies conectar con tol arcu atlánticu y con toa Europa, pero paez que l’executivu asturianu, y esta ye otra teoría mía, debe tener mieu otra vuelta a aquello que cuntaba la Sr. Migoya na llexislatura pasada “si ponemos vuelos baratos los asturianos van dir a Londres y non a Taramundi”. Tengo una idea pa evitar esa fuxida de “malos asturianos” que cada fin de selmana salen d’Asturies: Cortar les carreteres de vienres pela tarde a domingu, xueves o llunes incluyíu si hai festividá con ponte. Cualquier día…

Pero tornando al tema del tren d’alta velocidá, la idea de negase a esa llinia nun ye namás un perxuiciu p’Asturies. El mesmu presidente gallegu recordó que “diba ser difícil que llegare’l tren a Galicia ensin pasar per Asturies”. A estos que nieguen que l’AVE pase per tierres asturianes pa que pueda llegar a Galicia y al norte de Portugal ye a los que dempués se-yos enllena la boca cola “solidaridá interterritorial”. Al paecer los dirixentes asturianos aleguen un fuerte impactu ambiental y un coste altu. Problemes, estos, que paez que vascos, cántabros y gallegos solucionaron y que l’executivu asturianu nun ve cuando construye un “superpuertu” con grandes sobrecostes y estrozando ún de los cabos asturianos con más valor ecolóxicu. Y eso, ensin cuntar lo que va venir enriba de la esplanada d’El Musel que preparen a los pies del Cabu Torres.

Yá sabemos lo que mos queda nel futuru, les fines de selmana pa Taramundi, queramos o non, y pa dir a Galicia o Bilbao tendremos de garrar un barcu mercante nel nuevu Muselón, como aquellos asturianos que marchaben a facer les amériques, los nuesos güelos, les lleendes urbanes d’entós. Otru tren perdíu p’Asturies.

Esta entrada publicóse a 09/11/2007 a las 12:46 am y ta archivada baxo Inaciu Galán y González . Pues ver les rempuestes siguiendo RSS 2.0. Pues dexar una rempuesta, o trackback dende la to propia web.